WeCreativez WhatsApp Support
शबनम न्यूज मध्ये आपले स्वागत आहे.
मी आपली काय मदत करू शकतो ?

फुलांचा वापर सौंदर्य खुलविण्यासाठी देखील करता येऊ शकतो

फुलांचा वापर आता केवळ सजावटीसाठीच करण्यात येत नाही, तर त्यांचा वापर सौंदर्य खुलविण्यासाठीदेखील करता येऊ शकतो. सौंदर्य खुलविण्यासाठी अलीकडच्या काळात ‘फ्लावर फेशियल’ला अनन्यसाधारण महत्त्व प्राप्त झाले आहे. कोणकोणते लाभ होतील या फेशियलमुळे यावर टाकलेला हा दृष्टिक्षेप.

घातक रासायन असलेल्या फेशियलच्या तुलनेत फुलांचा फेशियल सध्या चलनात आहे. फ्लोरल ऑइल, फुलांचा रस यापासून हे फेशियल करण्यात येत आहे. या फेशियलमध्ये फुलांना यंत्राच्या सहाय्याने कुस्करण्यात येते. त्यानंतर त्यांचा लेप चेहऱ्यावर लावण्यात येतो. हे फेशियल पूर्णपणे हर्बल व नैसर्गिक असल्याने त्याचे दुष्परिणाम होत नाहीत. त्वचेला सुंदर बनविण्यासोबतच गोरेपणा, निखार, त्वचेवरील तेलकटपणा कमी करणे आणि सूर्यकिरणांमुळे पडणाऱ्या काळा डागांपासून मुक्ततेसाठी हे फेशियल उपयुक्त ठरते.

त्वचेची चाचपणी करा

फ्लोरल किंवा फ्लावर फेशियल करण्यापूर्वी त्वचेची चाचपणी करणे गरजेचे असते. ज्या प्रकाराची तुमची त्वचा आहे, त्या प्रकारचे फेशियल तुम्ही केले पाहिजे. उदाहरणार्थ तुमची त्वचा जास्त तेलकट असेल तर तेलकटपणा कमी करून त्वचेला तजेला देणारे फेशियल तुम्ही करून घेतले पाहिजे. तुमच्या त्वचेवर मुरूम, तारूण्यपिटिका, डाग असतील तर त्याच्या हिशोबाने गुलाब, रजनीगंधा, कारनेशन, गुलदावरी, जरबेरा, लिलियम, सूर्यफुल, चायनीज हिबिस्कस, मेरीगोल्ड यापैकी एखाद्या प्रकारातील फेशियल करता येईल.

माफक दरात उपलब्ध

वेगवेगळ्या ब्यूटी पार्लरमध्ये हे फ्लोरल फेशियल वेगवेगळ्या दरांमध्ये आता उपलब्ध झाले आहेत. काही फेशिलय अगदीच माफक दरात उपलब्ध आहेत. सुमारे १२० ते ५०० रुपये दरांनी हे फेशियल सध्या चलनात आहेत. नैसर्गिक आणि हर्बल असल्याने त्यांची मागणी मोठी आहे. रोझ फेशियलमधील टाटा रोझ सुमारे ६० रुपये प्रती नगाप्रमाणे मिळतात. अस्सल गावराणी गुलाब १२० रूपयांना डझनाला मिळेल. तुमचे बजेट जर अगदीच माफक असेल तर तुम्ही त्या हिशोबाने गुलाब, पांढरा रजनीगंधा, कार्नेशन जाफरी, ऑर्केड, लिलियम, पॅराडाइज आदी फुलांचाही फेशियलमध्ये समावेश करू शकता. जर तुमचा खिसा तुम्हाला पूर्णपणे परवानगी देत असेल तर ऑर्केड, लिलियम, बर्ड ऑफ पॅराडाइज सारख्या फुलांचाही समावेश करू शकता.

रोझ फेशियल

डाग असलेल्या चेहऱ्यासाठी रोझ फेशियल सर्वोत्तम इलाज आहे. नियमितपणे काही अंतराने या फेशियलचा वापर तुम्ही करू शकता. त्वचेला थोडा ताण देण्याचे काम या फेशियलच्या माध्यमातून केले जाते. वेगवेगळ्या प्रकारच्या गुलाबांच्या फुलांपासून तयार करण्यात आलेले फेशियल करून घेतल्याने व गुलाबजल वापरल्याने तुम्हाला ताजेतवाने वाटू लागेल. कोणत्याही प्रकारच्या त्वचेसाठी हे फेशियल उत्तम काम करते. त्यामुळे नैसर्गिक, हर्बलमध्ये या फेशियलला सर्वाधिक मागणी आहे.

मेरीगोल्ड फेशियल

कोरड्या त्वचेवर मेरीगोल्ड फेशियल उत्तम प्रकारे काम करते. त्वचेचा कोरडेपणा कमी करून तिला नैसर्गिक चमक देण्याचे काम हे फेशियल करते.

लॅव्हेंडरला द्या संधी 

चेहऱ्यावर जर मुरूम किंवा तारूण्यपिटिका असतील तर लॅव्हेंडरला संधी द्यायला हरकत नाही. चेहऱ्यावर सुरकुत्या पडल्या असतील तरीही लॅव्हेंडरला ऑइनयुक्त फेशियल केले पाहिजे. चेहऱ्यावर जखमेचे डाग, कट्स, बर्न किंवा सनबर्न असतील तरीही हे फेशियल करणे फायद्याचे ठरते.

सूर्यफुलाची कमाल

त्वचेचे पोषण करण्याचे काम सूर्यफुलाकडून होते. परिणामी सौंदर्य तज्ज्ञांच्या सल्ल्याने या फेशियलचा वापर करता येऊ शकेल. तुमची त्वचा जर मृतप्राय वाटत असेल तर या प्रकारचे फेशियल नक्की करावे.

त्वचेला येईल चमक

तुम्हाला त्वचेवर तजेला हवा असेल एक आगळीवेगळी चमक हवी असेल तर फ्लोरल किंवा फ्लावर फेशियल करणे हिताचे ठरते. पाच ते सहा सिटिंग्समध्ये तुमच्या चेहऱ्याला आगळावेगळा लूक येईल. चेहरा खुलून दिसेल. सुमारे १५ दिवसांतून एकदा या प्रकारातील फेशियल केले पाहिजे. त्यामुळे त्याचे चांगले परिणाम दिसू लागतील.

रसायन ठरते घातक

रसायनयुक्त पॅक वापरल्यामुळे अशा फेशियलदरम्यान चेहऱ्याला मोठे नुकसान होऊ शकते. क्वचितप्रसंगी चेहऱ्यावर पुरळदेखील येऊ शकते. त्यामुळे फ्लावर फेशियलचे पॅक वापरताना त्यात कोणतेही रसायन मिसळू नये. फ्लावर फेशिलय नैसर्गिक असले, तरी एखाद्या त्वचेवर एखादे फेशियल उपयुक्त ठरू शकत नाही. त्यामुळे योग्य व तज्ज्ञ सल्ला घेतल्याशिवाय असे फेशियल करण्याच्या भानगडीत न पडलेलेच बरे.

 

 

ताज्या बातम्या